Kinuwestyon ti zero-waste advocacy group nga EcoWaste coalition ti saan a pannakaipatungpal ti littering ban kabayatan ti Traslacion 2025.
Kasaruno daitoy ti inladawan da nga “out-of-control littering” a napasamak iti kangitingitan ti tinawen a pannakarambak ti piesta ni Jesus a Nazareno.
Kinuna ti grupo a nabati dagiti a buntuon ti basura iti tengnga ti selebrasion a nangitunda iti pannakabannog la unay dagiti boluntario ken waste workers.
Segun kenni zero waste campaigner Ochie Tolentino, nupay nainget nga impakat dagiti otoridad ti gun and liquor ban tapno masigurado ti kappia ken talna, masmasdaaw ti grupo no apay a saan a naiparit ti panagibelleng iti basura, a kinunana a maysa nga environmental offense a nainget a maiparit kadagiti national ken local laws.
Nadismaya ti grupo idi makita ti saan a strikto nga panangiparit iti panagibelleng iti basura kadaitoy a relihiyosong event iti baet ti pannakarambak ti Zero Waste Month ita nga Enero ken maika-25 nga anibersario pay ti Ecological Solid Waste Management Act.
Segun iti koalision, sumagmamano kadagiti basura a naguyod ket dagiti sleeping materials, food-waste, botelia a naglaon iti isbo, soiled diapers, plastics, cigarette butts, ken vapes.
Segun iti grupo, dagiti nakipaset iti Pahalik, Fiesta Misa mayor ken all-night vigil idiay Quirino Grandstand ken Parade ground ket pulo a saanda nga innala dagiti basurada kadagiti kakalsadaan ti Quiapo.
Mainaig iti daytoy, nagapela ti grupo kadagiti deboto para iti nadaldalus, mataginayon a selebrasion a maibagay iti espiritu ti panangipateg iti pammati ken ti planeta tayo.
