Masapul nga ibilang ti gobierno ti implasion ken regional wages agraman dagiti nutritional requirements no agkuenta para iti “food poor” threshold, nga inkuenta ti Philippine Statistics Authority (PSA) a kas P64 iti inaldaw.
Segun ti ekonomista a ni Emmanuel Leyco, saan nga umdas ti P64 tapno masustiner ti inaldaw-aldaw a kasapulan a taraon dagiti Pilipino.
Daytoy ket umay bayat a kinuna ni National Economic and Development Authority (NEDA) secretary Arsenio Balisacan itay napan a lawas, a ti binulan a threshold para iti pamilia a buklen ti lima ket P9,581 wenno P64 iti kada tao iti inaldaw.
Iti panagkuenta daytoy, kinuna ti Philippine Statistics Authority (PSA) a nadanon ti gatad kalpasan a nagastos ti menu para iti pammigat, pangngaldaw, ken pangrabii a mangipaay iti kasapulan nga enerhia ken sustansia, kas insagana ti maysa a nutritionist.
Ti sample food bundle ti ahensia a buklen ti tallo a taraon ket pakairamanan ti scrambled egg, kape nga addaan gatas, boiled rice wenno rice-corn mix a pammigat; balatong nga addaan marunggay, dried dilis, saba, boiled rice wenno mais mix iti pangngaldaw; prito nga ikan wenno boiled pork, putahe a nateng, boiled rice wenno mais mix para iti pangrabii; ken tinapay wenno boiled root crop para iti merienda.
Maipakita a P174.50 ti aggatad ti sample menu ti PSA iti Mega Q-Mart idiay Quezon City, saan pay a karaman ti bagas a P52 kada kilo, ken dadduma pay a cooking essentials kas iti lana ken asin.
Pinadas met ti Bayan Muna ti gumatang kadagiti ramen a naibasar iti sample menu ti PSA iti Commonwealth Market idiay Quezon City ngem nakagatang laeng iti balatong, asin, dua a saba, maysa a pedaso ti kamote, ken kakapat a kilo ti bagas .
Inadmitir ti PSA idi napan a lawas a saan nga umdas ti P64 per person daily amount tapno matungpal ti nutritional wenno dietary requirements iti maysa nga aldaw, innayon pay ti ahensya a marepaso ti agdama a metodolohia iti panangidatag iti food poverty ceiling.
Kinuna pay ti National Nutrition Council idi napan a lawas a saan nga umdas ti P64 tapno makadanon iti mairekomendar nga enerhia ken sustansia para iti bagi ken ti kaadda ti kata a klase ti diet iti napaut a panawen ket mabalin nga agtungpal iti sakit ken nakapuy a performance.
