Nangipaay ti gobierno ti Amerika iti P84 milion wenno $1.5 milion a humanitarian assistance para kadagiti biktima ti bagyo Kristine.
Segun iti US Embassy a nakabase sadiay Manila, daytoy a pondo ket maysa nga augmentation iti agtultuloy a panagregget ti US Agency for International Development (USAID) a mangiwaras iti lifesaving assistance para kadagiti naapektaran iti bagyo idiay Bicol ken Batangas.
Kinuna pay ti Embahada a babaen iti kastoy a pondo, makaipaay ti US Agency for International Development kadagiti kasapulan a serbisio kas iti nadalus a danum, sanitasion, emergency shelter ken pinansial a tulong.
Makatulong pay ti ahensia iti panangipaay iti logistic support iti pannakatarawidwid dagiti evacuation centers.
Kabayatanna, ti US Agency for International Development ti immuna a timmulong iti Office of the Civil Defense idi Domingo, Oktubre 27 iti pannakaiwaras dagiti shelter-grade tarpaulins ken household relief kits sadiay Bicol babaen ti C-130 nga inted ti gobierno ti Singapore.
Nai-preposition metten dagiti disaster relief items iti OCD humanitarian relief depot sadiay Fort Magsaysay, maysa nga EDCA idiay Nueva Ecija.
