Pimmusayen ni sigud a Bureau of Corrections (BuCor) Director General ken National Bureau of Investigation (NBI) Deputy Director Rafael Ragos.
Kinumpirma daytoy ti kaanakan na a ni Winston Ragos ngem saanen a nangipaay pay ti dadduma a detalye.
Maysa kadagiti witnesses ni Ragos kontra kenni sigud a Senador Leila de Lima a naakusaran a pasimuno iti panaglakoan ti ilegal a droga iti New Bilibid Prison idi justice secretary pay laeng isuna.
Nagbalin a basaran iti testimonya na para iti panangipila ti maysa kadagiti tallo a drug cases kontra kenni de Lima iti Muntinlupa Regional Trial Court.
Imbabawi met laeng ni Ragos iti testimonyana idi Abril 2022 ken imbutaktak a napilitan laeng isuna nga agulbod gapo iti pammilin idi ni sigud a National Police Commission (NAPOLCOM) Commissioner Vitaliano Aguirre II, rason tapno ma-acquit ni de Lima idi Mayo 2023.
Nangidanon met ti panakipagrikna ni Mamamayang Liberal party-list Rep. Leila de Lima kadagiti kabagyan ni Ragos ken rinaem na daytoy gapo iti panangibutaktak dagiti adda iti likudan ti panangdadael kenkuana.###
