BR LA UNION – Impayaan ti executive clemency ni President Ferdinand Marcos Jr. ni sigud nga Iloilo City Mayor Jed Patrick Mabilog.
Kinumpirma daytoy ni Exec. Secretary Lucas Bersamin.
Inaramid ti Presidente iti addang kas paset kadagiti inisyatibo ti agdama nga administrasyon tapno maikkan ti gundaway a makapag-rugi manen dagiti indibidual a nakapadas ti legal challenges wenno kaso ti napalabas.
Paset pay daytoy ti pannakaipatungpal ti mandato ti Presidente iti sidong ti linteg.
Naamwan a ti desisyon ni President Marcos ket dimmalan iti nainget a panagadal ken naikonsidera iti rekomendasyon ti Board of Pardons and Parole.
Ni Mabilog ket sumangsango iti kaso a panaglabsing iti RA 3019 wenno Anti-graft and Corrupt Practices act ken RA 6713 wenno Code of Conduct and Ethical Standards for Public Officials.
Maipalagip nga idi August 30, 2017 pimmanaw ni Mabilog ditoy Pilipinas kalpasan nga akusaran ni sigud a President Rodrigo Duterte a kabilang daytoy iti listaan dagiti public officials a maipagarop a karaman iti illegal drug trade ken drug protector.
September 2024 idi nakasubli ditoy pagilian manipud US ken naipasidong iti asylum.
Dimmar-ay ni Mabilog iti Quad Comm hearing idi September 2024 ken pinaglibakan na manen dagiti akusasyon kenkuana ti sigud nga administrasyon.
