BR LA UNION – Saan a nalapdan ni sigud a Vice President Leni Robredo a mangidilig iti nagbalin a kasasaad ni sigud a Senador Leila de Lima iti agdama a kasasaad ni former President Rodrigo Duterte iti detention facility ti International Criminal Court (ICC).
Iti maysa a press conference iti siyudad ti Naga, kinuna ti sigud a Bise Presidente a saan a kwinestiyunaran ti dati a Senador ti due process ken sinangona ti amin uray nu biddut dagiti akusasyon kontra kenni De Lima.
Kinuna pay ni Robredo a maibasar kadagiti report, nasayaat ti pannakaaywan ti sigud a Presidente ken addaan ti access iti computer, banag a naipaidam kenni De Lima idi daytoy ti naibalud.
Innayon pay ti sigud a Bise Presidente a mapalubosan met ti panagbisita ti conjugal ken family visits bayat nga adda iti kustodiya ti ICC ti sigud a Presidente, idinto a linagip ni Robredo ti kasasaad ni De Lima nga addaan laeng iti electric fan ken awan ti access iti computer nga uray nakatugaw pay laeng idi a senador idi tiyempo a naaresto ken insur-suratna laeng dagiti official document bayat ti kaaddana iti pagbaludan bayat ti panangipatungpal iti trabahona kas senador.
Dinakamat pay ni Robredo ti napasamak a hostage taking kenni De Lima iti uneg ti detention facility idi ginandat ti maysa a balud ti aglibas, a nangikabil iti peggad ti biag ti sigud a senador.
Inaramid ti sigud a Bise Presidente ti statement iti baet dagiti reklamo manipud iti kampo ti sigud a Presidente nga awan ti due process iti pannakaaresto na.
Maipalagip a dandani 7 a tawen a naibalud ni De Lima idiay Camp Crame gapu iti maipagarup a pannakairamanna iti illegal drug trade ngem naibasura idi agangay, idinto a naaresto ni sigud a Presidente Rodrigo Duterte idi Martes, Marso 11 babaen ti bileg ti ICC arrest warrant gapu iti maipagarup a crimes against humanity gapu kadagiti pammapatay iti war on drugs idi panawen ti administrasyonna.
Ti sigud a presidente ket agdama a nakabalud iti detention facility idiay Scheveningen, The Hague, Netherlands a pakasarakan ti headquarter ti ICC, bayat a maur-uray ti pre-trial hearing inton Setyembre 23, 2025.
