BR LA UNION – Naglosolos iti puwesto ni Atty. Herbert Matienzo kas executive director ti Philippine Contractors Accreditation Board (PCAB).
Segun kenni Department of Trade and Industry (DTI) Secretary Cristina Roque, inawat na iti panaglosolos ni Matienzo idi kalman, Setyembre 3, 2025, gaputi personal a makagapo.
Ti panaglosolos na ket kasaruno dagiti kontrobersiya a sangsangwen ti PCAB seknan dagiti maipagarop nga irregularidad iti contractor accreditation ken flood control projects.
Itay nabiit ket impasidong ni Roque iti direkta a superbisyon iti PCAB ken dadduma pay a board ti Construction Industry Authority of the Philippines (CIAP) tapno nainget nga imbestigaran dagiti alegasyon ti conflict of interest ken panagabuso iti bileg.
Kagiddan daytoy, nangrugin ti revamp iti ahensya, segun kenni DPWH Secretary Vince Dizon, kas sungbat kadagiti anomalya iti proyekto ti gobyerno a nanggubway ti perwisyo kadagiti umili ti naduma-duma a paset ti pagilian.
Sakbay a naglosolos, naipadamag nga imbabawi ti PCAB iti lisensya ti siyam a construction firms a konektado iti negosyante a ni Sarah Discaya, a mairam-raman iti anomalya dagiti flood control projects.
Idiay Senado, nababalaw iti PCAB gaputi maipagarop a corporate recycling, agsipudta dagiti blacklisted a kumpanya ket makapag-operate latta iti sidong ti baro a nagan.
Segun kenni Sec. Dizon, maipasidong iti nalawa a revamp iti PCAB kas sungbat dagiti probleman a timpuar kadagiti proyekto ti gobyerno.
