BR LA UNION – Nainget a kinondena ni Deputy Speaker David “Jay-Jay” Suarez iti “weaponization” ti biddut nga impormasyon nga ar-aramiden ken iwar-waras dagiti peke a pro-Duterte social media accounts, a segun kenkuana ket mangpakapsot iti demokrasya ti Pilipinas iti umadanin a 2025 midterm elections.
Mamati ni Suarez a maysa daytoy a digital warfare ket iti battlefield saan laeng nga internet ngem uray pay iti puso ken panunot dagiti milyon a Pilipino.
Reaksiyon daytoy ni Suarez iti maysa a report ti Reuters a nangibutaktak iti panagusar dagiti peke nga account iti social media tapno dayawen ni sigud a presidente Rodrigo Roa Duterte ken impluwensyaan ti isyu seknan iti umadanin nga eleksiyon.
Segun iti research ti Israeli tech firm a Cyabra, mapatta-patta a maysa ti tunggal tallo nga account nga agpo-post seknan iti pannaka-aresto ni Duterte ti International Criminal Court (ICC) ket peke.
Maibasar pay iti report, aganay 45% a diskurso seknan iti 2025 elections ket iwar-waras dagiti peke nga account kas ti bots, fake profiles, ken mabay-bayadan nga influencers—ket umabot daytoy ti minilyon a netizens.
Segun kenni Suarez, pumigpigsa ken lumalaing dagiti network ti disinformation isunga in-inut a magab-gaburan iti boses dagiti pudpudno a tao iti internet, idinto nga in-inut a madad-dadael ti talek ti publiko kadagiti institusyon a rumbeng nga agserbi kadakuada.
Nagpanawagan ni Suarez kadagiti dadackel a social media platforms kas iti Meta, X (sigud a Twitter), ken YouTube a dagus nga ikkaten ken seryoso a sangwen iti problema dagiti fake account nga aggi-giddan nga agiwar-waras ti disinformation.
Kagiddan daytoy, inallokoy na pay a mapapigsaen iti kampanya para iti digital literacy tapno matulungan dagiti Pilipino a mangdetermina ken labanan iti online manipulation.
Nagpanawagan pay ni Suarez iti amin a politiko nga itandudo iti nadalus ken pudno nga eleksiyon.
