LA UNION – Imbestigaran pay ti Senado dagiti lima a villa iti Fontana Leisure Parks idiay Mabalacat, Pampanga a kaudian nga niraut ti Presidential Anti-Organized Crime Commission (PAOCC).
Dagiti nakalibas idiay Lucky South 99 POGO hub sadiay Porac, Pampanga ket napan ken nagdagas ditoy nu sadiay ti maysa a villa ket okupado ti maysa kadagiti “big bosses” nga isu ti Chinese fugitive Huang Zhiyang a partner met ti suspended Bamban, Tarlac Mayor Alice Guo iti Baofu Compound.
Adda pay dagiti nasarakan a dokumento ni Zhang Ruijin a nasentensiaan iti big money laundering cases idiay Singapore ken konektado metlaeng kenni Guo.
Segun kenni Senate Committee on Women Chairperson Risa Hontiveros, posible nga imbestigaranda met ti Fontana para iti pannakaileppas ti imbestigasion kadagiti Philippine Offshore Gaming Operators.
Impasingked ni Hontiveros a nasaknap unay ti koneksion dagiti Philippine Offshore Gaming Operators ditoy pagilian no sadino a dakkel ti posibilidad a nakakonekta ken adda grupo dagiti kompania iti likudanna.
Kinunana a daytoy ket gapu ta no adda rauten dagiti otoridad ken adda dagiti makalibas, agtaray ken aglemmengda kadagiti dadduma pay nga POGO hubs.
Pumigpigsa ti pammati ni Hontiveros a saan laeng a sumagmamano a probinsia ti problema kadagiti Philippine Offshore Gaming Operators no di ket dimmanon daytoyen iti nasional, rehional ken uray pay iti internasional.
