Imbatad ni University of the Philippines College of Law senior lecturer Atty. Lee Edson Yarcia a kadkadlaw a sinaganaan ti defense panel ni sigud a Presidente Rodrigo Roa Duterte ti presentasyon da nga argumento kontra prosekusyon idiay International Criminal Court.
Karaman kadagiti kinuna ti propesor ket ti argumento ni lead legal counsel Nicholas Kaufman seknan ti panangaramat ti prosecution kadagiti circulars, directives, ken memos nga inruar ti Philippine National Police idi panawen ti war on drugs nga inawagan na kas ‘selective’ wenno saan met nga isu a talaga iti kayat na a satwen.
Inyarig pay ni Yarcia dagiti naipresentar a direktiba ti sigud a presidente kadagiti pulis a mangusar laeng ti ‘puwersa’ nu agpeggad ti biag da.
Sinublianan na met ti presentasyon iti prosecution ken kinuna a nabaelan ti panel a mangipasdek ti ebidensya a ni Duterte ti nangidaulo kadagiti pammilin a nagresulta ti nalawa a pammapatay.
Maysa kadagiti nadakamat ket ti video ti panagbetla na a mangak-aklon nga isuna ti nangibilin kadagiti operasyon ken uray ti panangipaulog ti ultimatum kadagiti ‘illegal drugs personalities’ nga idi agangay ket natay iti police operation.
