BR LA UNION – Nainget ti panangkontra ni sigud a Presidente Rodrigo Duterte iti aniaman a plano nga ilako iti balayna iti Doña Luisa Village idiay Davao City, segun iti anakna a ni Davao City First District Rep. Paolo Duterte.
Immuna a nagwaras iti ladawan ti da-an a balay ti sigud a Presidente nga addaan iti karatula a “For Sale” iti napalabas a weekend.
Ngem iti interview iti mammanday-linteg a nabiit pay a simmarungkar iti amana iti International Criminal Court (ICC) detention facility idiay The Hague, Netherlands, maipagarop nga imbaga kenkuana ti sigud a presidente nga adda nauneg a sentimental value kenkuana ti nasao a sanikua gaputa daytoy ti umuna a balay a ginatangna babaen ti bukodna a kuwarta, isunga saanna a kayat nga ilako uray no nakabalud iti sabali a pagilian.
Inlawlawag pay ni Cong. Pulong a ti nasao a balay ket sabali iti sanikua a kinumirma ti longtime partner ti sigud a Presidente a ni Honeylet Avanceña a mailaklako, a daytoy met ti mangted lawag kadagiti damag nga adda riri ti pamilya gapu iti sanikua da.
Kabayatanna, indanon ti mammanday-linteg ti mensahe ti sigud a Presidente kadagiti umili a Pilipino, nga agyaman iti suportada ken imbagana a saanen a problemaen daytoy gaputa maipagarop a maaklon ti sigud a Presidente nu dayta ti gasatna.
