Nagpakdaar ti Department of Energy (DOE) kadagiti amin a kompanya ti langis ken kadagiti gasolinaan a strikto a suroten ti naituding a presyo dagiti produkto a petrolyo.
Daitoy ket kasaruno ti damag a dagiti gasolinaan ket nangipangato a dagos ti presyo ti produkto da a nasapsapa iti umiso nga schedule ti price adjustment.
Segun iti ahensya, nasken nga agay-ayam laeng ti P49 agingga P76 kada litro ti presyo ti gasolina, depende ti klase; nasurok P78 agingga P99 laeng ti rumbeng a presyo ti kada litro ti kerosene; P49 agingga P66 kada litro met ti Diesel manipud Marso 6 agingga inton bigat Marso 9.
Pinaregta pay ni Energy Secretary Sharon Garin ti publiko a tumulong iti panangi-report kadagiti managgundaway a gasolinaan nangruna ket awan pay a dapat ti panagngato ti presyo agingga Martes.
Kabayatanna, nagpalagip ti Energy Department kontra hoarding ken ilegal a panaglako ti petrolyo, a maysa a panaglabsing ti linteg ken mabalin a sumango iti pannusa wenno kanselasyon ti permit.
Iti agdama ket strikto ti Department of the Interior and Local Government ken Philippine National Police iti monitoring kadagiti gasolinaan, kas maiyannurot ti direktiba ni Presidente Ferdinand R. Marcos Junior.
