Umanamong dagiti lider ti Quad Committee ti Kamara a mangsakup iti gastos iti plete ken pagdagusan ni dati a Presidente Rodrigo Duterte tapno laeng tumabuno iti hearing mainaig kadagiti kaso ti extrajudicial killing iti kampaniana a war on drugs.
Nakasagana nga agpatak-patak da Quad Comm overall chair Robert Ace Barbers ken dagiti co-chairman nga isuda Dan Fernandez, Bienvenido “Benny” Abante Junior, Joseph Stephen “Caraps” Paduano, vice chair Romeo Acop, Senior Deputy Speaker Aurelio “Dong” Gonzales Junior, ken Deputy Speaker David “Jay-jay” Suarez tapno laeng saan nga agbalina a karit iti gastos iti panagdar-ay ni Duterte iti hearing.
Iti napalabas nga interview ni Duterte, kinunana nga awan ti panggastos na isu a saan a makaatender iti Quad Comm hearing.
Ti saan a panagatender ni Duterte ti nangpadismaya kadagiti kongresista a kas kada Majority Leader Manuel Jose “Mannix” Dalipe, House Assistant Majority Leaders Jay Khonghun ti Zambales ken Paolo Ortega ti La Union, a nangibaga a mabalin a mabuteng ni Duterte kadagiti saludsod ket ngarud saan a tumabuno.
Iti napalabas a hearing, kinuna ni Paduano, chair ti Committee on Public Accounts a mabalin a nairanta ti saan a panagatender ni Duterte ngem iti simmaruno a surat ni Delgra, kinunana nga inkeddeng ti dati a Presidente ti saan a tumabuno gapu ta naikuna a saanen a kasapulan kalpasan ti panagparangna iti Senate hearing ken usaren laeng ti Kamara a pang-kaso kenkuana.
Kinuna dagiti lider ti Quad Comm a seriosoda kenni Duterte a maammuan ti kinapudno.
Segun ken ni Acop, ti kinasagana dagiti lider ti komite a mangbusbos ket maysa a demonstrasion a kayatda ti mangisayangkat iti nauneg nga imbestigasion tapno maammuan ti kinapudno.
Impasingked ni Gonzales ti kinapateg ti transparency ken patien ni Suarez a napateg ti testimonia ni Duterte iti hearing.
Iti laksid ti maulit-ulit nga imbitasion, saan a timmabuno ni Duterte iti Quad Comm hearing no di ket timmabuno iti Senate hearing iti umuna nga imbitasionna.
