Suportado ti Malacañang ti baro a mental health hotline iti Department of Education (DepEd) para kadagiti estudyante a makapadpadas a nakaro a problema-mental ken agkasapulan ti madagdagos a tulong.
Segun kenni Palace Press Officer Claire Castro, saan a rumbeng a tagiawanen wenno ikabain ti mental health concerns agsipud ta adda iti gobierno a nakasagana nga umalalay ken agdengngeg kadagiti agkasapulan ti suporta.
Mainaig kadaitoy ket inyuswat ti DepEd iti Learners TeleSafe Contact Center Helpline nu sadinno ket mabalin a tumawag dagiti estudyante iti numero #33733 para ti tulong ken interbensyon.
Direkta met a nakakonektar iti hotline sadiay National Center for Mental Health tapno naparpartak a makadanon kadagiti propesyonal iti awag.
