Nagprotesta dagiti ground commanders ti Western Mindanao Command kontra iti Moro Islamic Liberation Front (MILF) mainaig iti nadara nga enkuentro sadiay Sumisip, Basilan idi Mierkoles, Enero 22.
Iti press briefing iti Armed Forces Western Mindanao Command Hospital, kinuna ti hepe ti Armed Forces of the Philippines a ni General Romeo Brawner Junior nga amin a ground commanders a naidestino iti Western Mindanao Command area ket nangipila kalpasan a naammuan nga adda dagiti kameng ti MILF ti nangaramid iti ambush a timmulong iti grupo dagiti lawless elements nga indauluan da Najal Buena ken Oman Hajal Jalis.
Nagsurat dagiti ground commanders iti protesta babaen ti Government Panel for Hostilities-Coordinating Committee on the Cessation of Hostilities.
Segun iti hepe, naipadamagen kenni Presidente Ferdinand Marcos Junior ti insidente.
Nupay kasta, impanamnama ni Brawner a maipasangoda kadagiti lawless elements iti likudan dagiti ilegal ken naranggas nga aktibidad maibusor kadagiti tropa ti gobierno.
Kabayatanna, sinarungkaran met ni Heneral Brawner dagiti nasugatan a soldado a nakaconfine sadiay Armed Forces Western Mindanao Command Hospital ken idiay Isabela city, Basilan.
Nakaawatda iti pinansial a tulong manipud iti militar ken inted pay ti hepe ti AFP kadagiti nasugatan a soldado manipud iti 32nd Infantry Battalion ti Wounded Personnel Medal gapu iti kinatured ken kinabannuarda.
Maipalagip a napasamak ti ambush kadagiti soldado bayat ti panang-escort da iti UN Development Programme; Napatuduan ti bala dagiti soldado idi bumallasiwda iti kalsada sadiay Barangay Lower Cabengbeng a nakatayan ti dua ken nakasugatan ti 12 a dadduma pay.
