Naidetene ni dati a presidential spokesperson Harry Roque iti 24 nga oras idiay House of Representatives kalpasan nga in-cite in contempt dagiti uppat a House committees a mangim-imbestiga kadagiti krimen mainaig iti Philippine Offshore Gaming Operators ken ti war on drugs.
In-cite in contempt ti joint panel ni Roque kalpasan nga intudo ni Kabayan party-list Representative Ron Salo a nagulbod ti dati a pannakangiwat maipapan iti rason a nanglaksid iti hearing idi Agosto 16.
Ni Roque ket dati a pannakabagi ti Kabayan party-list.
Inted ni Salo iti komite ti kopia ti sertipikasion manipud iti Manila Regional Trial Court nga awan ti hearing ni Roque idi Agosto 16 ken saan a nagparang kadagiti korte ti Manila iti nadakamat a petsa.
Kinuna ni Surigao del Norte lawmaker Ace Barbers, chairman ti House Committee on Dangerous Drugs, nga inpamatmat dagiti rekord ti korte a ti hearing nga ibagbaga ni Roque iti panangilawlawag na iti kaawan na ket idi Agosto 15.
Gapu ta ni Northern Samar lawmaker Paul Daza ti agmaymaysa a kameng a saan nga umanamong, intuloy ti komite ti mosion ni Salo a ma-cite in contempt ni Roque.
Gapu iti contempt order, maibalud ni Roque idiay Batasang Pambansa Complex iti 24 nga oras kas konsiderasion a dati a kameng isuna ti Kamara ken ti panagkiddawna iti dispensar gapu iti inaramidna.
Sumangsango ni Roque iti panagdengngeg gapu iti maipagarup a partisipasyon na kas abogado ti Lucky South Star 99 POGO firm, no sadino nakumpiskar dagiti sanikua dagiti dati nga staff na idiay Malacañang kabayatan ti panagraut dagiti otoridad sadiay Porac, Pampanga.
Inlibakna a nagserbi a kas abogado ti Lucky South 99 ken a kunana nga isu ket nangipaay laeng iti balakad maipapan iti panangsiguro kadagiti lisensia ti POGO para ken ni Cassandra Ong a nangibagi iti Whirlwind firm, saan a ti Lucky South 99.
Pinadas ni Roque nga apelaren ti contempt order babaen ti panangdakamatna iti karbengan na ngem kinuna ni Barbers a marisut daytoy bayat ti sumaruno nga aldaw ti hearing.
