Mangnamnama dagiti doktor wenno eksperto iti salun-at a nairaman iti kontrobersia ti Dengvaxia a maragpatda ti hustisia ken dagiti nasudi a kasoda ket ilaksid metten ti korte.
Daytoy ket kalpasan a ti Department of Justice (DOJ) ket nangilaksid kadagiti 98 a kaso gapu ti kinakurang ti ebidensia ken awan ti pakaigapuan nga ebidensia a mangpaneknek a ti ipapatay dagiti ubbing na natudokan ti Dengvaxia ket nainaig iti bakuna.
Nagyaman met ti sigud nga health undersecretary, Doctor Kenneth Hartigan-Go, maysa nga internist clinical pharmacologist, toxicologist, Fellow ti Royal College of Physician Edinburgh, ken Fellow ti Institute of Corporate Directors, gapo iti panangilawlawag iti kaso.
Innayonna a dagiti “peke nga eksperto” ket rumbeng a makanselar dagiti lisensya da.
Kinuna ni Hatigan-Go a komplikado ti isyu kasta met kadagiti padada a doktor wenno dagiti public health specialists ket marigatan tupay a manilawlawag iti publiko.
Ni Hartigan-Go ket kameng ti World Health Organization (WHO) Advisory committees for Safety of Medicinal Products iti maysa a dekada ken innem a tawen iti Global Advisory Committee on Vaccine Safety (GACVS), ti katupag a komite ti WHO Strategic Advisory Group of Experts (Masirib).
Inlawlawag ni Department of Justice undersecretary Raul Vasquez nga inwaksida ti 98 a kaso ti Dengvaxia gapu ta awan ti direkta a nakaigapuan ti relasion ti nasao a bakuna ken ti ipapatay dagiti ubbing.
Innayon ni Vasquez nga amin a sientipiko nga ebidensia ket nagkuna a natay ti dadduma nga ubbing iti tallo a lawas kalpasan ti pannakabakunada iti Dengvaxia idinto a dadduma ket kalpasan ti makatawen.
Impaganetget na nga iti sidong ti criminal procedure, adda dapat ti cause-effect relationship.
Dinakamat na ti kaawan ti umno a pannakailawlawag no apay a dagiti napagsaludsodan ket binaybay-anda a mangipalubos ti panagbakuna ti Dengvaxia, a nangipaganetget a kaaduan kadagiti ebidensia a naisubmitir ket maibasar laeng kadagiti damag.
Kinapudnona, binilin ti DOJ ti prosecutor general a mangikkat iti 98 a kaso kontra iti sigud a health secretary ken Iloilo first district representative a ni Janette Garin ken dadduma pay a medical professionals.
