LA UNION – Nadundunor ti maysa a 12-anyos nga ubing kalpasan a nadungpar ti mini-dump truck bayat nga agawid koman itay tengngat’ aldaw kagiddan ti umuna nga aldaw ti klase.
Ti biktima ket nabigbig a ni Arlyn Lim, grade 7 student, residente iti Brgy. Payocpoc Sur.
Maibasar iti inisial nga imbestigasion ti pulisia, manmanehuen ti managan Mark Phillip Comilang, 30, residente iti Sta. Maria, Ilocos Sur, ti nasao a truck idi bimmallasiw ti biktima ket nadungpar ti ubing.
Kas resulta, natumba ti estudiante ken dagus a naitaray iti rural health unit (RHU) tapno maagasan.
Inaklon met ti driver a saanna a nasiputan ti panagballasiw ti biktima iti kalsada isu a napasamak ti insidente.
