LA UNION -Nakikaysa iti Hollywood actor a nalatak kas maysa nga environmental advocate a ni Leonardo DiCaprio kadagiti panawagan tapno protektaran iti Masungi Geo-reserve a masarakan idiay Rizal Province ditoy Pilipinas.
Iti imbinglay a post ti international star iti bukod na nga instagram account idi kalman, Huwebes, imbaga na a dackel a paset ti Masungi iti nakalbo idi 90s ken biniyag iti lokal a komunidad babaen ti conservation activities tapno protektaran ti nasao nga ecosystem.
Ngem pagdandanagan manen ita a mapukaw ti nasao a ballaygi ti local communities iti tengnga ti manamnama a panang-kanselar ti Department of Environment and Natural Resources iti katulagan a mangsal-salaknib iti Masungi manipud iti nasaknap a land grabbing activities wenno dagiti aktibidad a panaggam-gam ti daga.
Impaganetget ni DiCaprio a ti nasao a kanselasyon ket makatubeng iti ballaygi para iti konserbasyon a binigbig ti intero a lubong ken bay-an manen iti lugar nga agbalin a vulnerable iti panagmina, panagtroso ken illegal developments iti lugar.
Gaputi dayta, nakikaysa ni DiCarpio kadagiti local ranger iti panawagan kenni President Ferdinand Marcos Jr. a makibiang ken ituloy a protektaran iti Masungi Georeserve.
Iti ballaygi iti conservation kas iti Masungi ket agserbi a palagip, a ti Pilipinas ket mangun-una iti sustainability, eco-tourism, biodiverstiy ptotection ken climate action.
Inaramid ti sikat a Hollywood actor iti panawagan kalpasan nga inrekomenda ti DENR a kanselaren iti 2017 deal iti Masungi Georeserve Foundation Inc. para iti konserbasyon ti 2,700 nga ektarya ti Masungi idiay Rizal gaputa maipagarop a mailabsing iti konstitusyon, iti probisyon a nakapauneg iti katulagan.
