BR LA UNION – Kiniddaw ti House prosecution panel iti Senate impeachment court ti 62 a trial dates tapno maiprisinta dagiti ebidensiya ken testigo iti impeachment case kontra kenni Bise Presidente Sara Duterte.
Segun kenni House legal spokesperson Atty. Benjamin “Jay” Tolosa Jr., ti kadawatan ket maibasar iti bilang dagiti testigo ken ebidensiya a nailista iti pre-trial brief.
Kabayatanna, 30 laeng a trial dates ti kidkiddawen ti kampo ti depensa ni VP Sara.
Inlawlawag ni Tolosa a saan a kaipapanan nga agpaut ti 62 nga aldaw ti panagusig gaputa mabalin a mapa-ababa no ipalubos ti korte ti pannakadengngeg ti nasurok maysa a testigo iti kada aldaw.
Kinunana pay a nakalista ti depensa iti 97 a testigo, pakairamanan dagiti 51 a kapada dagiti adda iti listaan ti prosekusyon.
Malaksid dayta, 248 kadagiti 276 nga ebidensya ti prosekusyon ti nairaman kadagiti ebidensiya nga insubmitir ti depensa.
Ti pinal a bilang dagiti trial dates ket ikeddeng ti Senate impeachment court iti pre-trial order.
