LA UNION – Nagtignayen ti Interagency Task Force (IATF) ditoy rehiyon uno tapno protektaran dagiti frontliners manipud kadagiti anyaman a kita ti diskriminasyon.
Iti maysa a waragawag wenno mensahe, nainget iti ballaag ti Interagency Task Force for the Management of Emerging Infectious Disease ditoy Ilocos Region, kabinnulig na iti Regional Disaster Risk Reduction and Management Council (RDRRMC-1) ken Regional Development Council–1 (RDC-1) nga isardeng iti diskriminasyon kadagiti frontliners.
Sungbat daytoy ti task force iti maaw-awat da a reports maipapan iti diskrimanasyon kadagiti frontline workers, healthcare professionals ken kadagiti Person under Investigation (PUIs) ken PUMs.
Nainget a kondinaren ti task force iti amin a kita ti diskriminasyon kadagiti frontliners, agraman dagiti insidente ti coercion wenno panagpangta, libel, slander, ken physical injuries, agsipudta saan a maiparbeng nga aramid dagitoy.
Sinaluduan met iti task force dagiti local chief executives manipud kadagiti uppat a probinsiya ditoy ilocos region.
Al-allukoyen ita ti task force dagiti local chief executives, a tumulong iti pannakaprotektar dagiti frontliners iti masakopan dagitoy, tapno maitultuloy latta iti responsibilidad dagitoy a makapagserbi iti ili, kangrunaan na kadagiti PUIs ken PUMs.
Kasapolan kuna ti IATF nga adda maputar wenno mapanday nga ordinansa a mangipataw iti pannusa kas iti administrative charges, criminal, civil wenno multa kadagiti agaramid ti diskriminasyon wenno mangdangran kadagiti frontliners.
Impaganetget ti task force a rumbeng a pagyamanan ken ayat ti ipaay ti publiko kadagiti frontliners a saan ketdi a pungtot ken panangumsi.
