BR LA UNION – Inlawlawag ti International Criminal Court (ICC) no apay a masapul a matiliw ni sigud a President Rodrigo Duterte kalpasan ti pannakaipaulog ti arrest warrant kontra kenkuana.
Iti nairuar a 15-page order ti ICC a pinirmaan da Pre-Trial Chamber Presiding Judge Julia Antoanella Motoc, Judge Sophie Alapini-Gansou, ken Maria del Socorro Flores Liera, napateg ti pannakaaresto ken pannakaibalud ni Duterte tapno masigurado a dumar-ay iti hearing.
Impaganetget ti ICC, saanda a namnamaen a makitinnulong ken dumar-ay ti sigud a presidente no summon laeng ti maipatulod.
Segun iti international court, ti desisyon ket resulta ti pakaseknan a nasaknap pay laeng ti impluensiya ti sigud a presidente iti laksid nga awanen ti anyaman a posisyon.
Impaganetget pay ti ICC nga adda ‘heightened risk of interference’ wenno ti posibilidad a makibiang iti imbestigasyon ken posible a pangta kadagiti testigo ken biktima.
Gapu iti dayta, napateg ti panangarestar ti sigud a presidente tapno mataginayon ti integridad iti maisayangkat a pannakadengngeg ken malapdan ti anyaman a pannakataktak wenno pannakadadael ti agtultuloy a legal a proseso.
Immuna nga inruar ti ICC Pre-Trial Chamber ti warrant idi Marso 7 gapu iti maipagarup a crimes against humanity ti sigud a presidente sipud pay idi mayor idiay siyudad ti Davao ken idi nagbalin a presidente ti Pilipinas.
Dagitoy ket krimen a mapapati nga inaramid ni Duterte manipud Nobiembre 1, 2011 agingga iti Marso 16, 2019.
