Impaganetget ni Senador Ronald “Bato” Dela Rosa a saan nga hustisya ti panggep ti International Criminal Court nu di ket tapno makontrol dagiti member-states da.
Ti statement ni Dela Rosa ket kalpasan ti inwaragawag ni Department of Justice Secretary Jesus Crispin Remulla a silulukat ti pagilian a makidayalogo iti ICC seknan ti imbestigasion iti war on drugs ti administrasion ti Duterte.
Para kenni Dela Rosa, nalawag nga inpilit ti ICC ti mangisayangkat iti imbestigasion laksid ti panaglosolos ti Pilipinas iti International Tribunal membership.
Napaliiw pay ti Senador ti agsusupadi nga opinion ti dua a hues ti ICC Appeals Chamber a ti kiddawda nga autorisasion ti imbestigasion ket naipila idi ti Pilipinas ket saanen a paset ti Rome Statute.
Nupay kasta, kinuna ti Senador a dina sungbatan ti aniaman nga awag manipud iti ICC ta katupag dayta ti panangbigbig iti hurisdiksionda ditoy pagilian.
