Inarestar ti National Bureau of Investigation (NBI) ti maysa a Vietnamese National a nabigbig a ni Trinh Thi Kieu Nguyen a pagaammo pay kas ‘Doctor Rosa’, gapu iti maipagarop nga ilegal a panangtarawidwidna iti beauty clinic sadiay Mandaluyong City.
Natiliwan daytoy iti entrapment operation idi Enero 8, 2025, iti bukodna a beauty clinic kalpasan nga inawatna ti P16,000 manipud kadagiti undercover agents kas bayad ti Botox procedure ken chin nano filler.
Kinumpiskar ti NBI ti marked money ken nagduduma pay a medical equipment manipud kenkuana.
Maipasango ni Nguyen iti kaso nga illegal practice of medicine segun iti Republic Act 2382, wenno Medical Act of 1959.
Kidkiddawen pay ti NBI iti Bureau of Immigration a kitaenda ti kasasaad ti panagnaedna ditoy pagilian.
Nagtaud ti operasion iti tip manipud iti confidential informant ken nakumpirmaan nga mangidiadiaya ni Nguyen ti nadumaduma a cosmetic surgery kas iti eyelid surgery ken vaginal tightening iti klinikana.
