Patien ni Presidential Anti-Organized Crime Commission (PAOCC) spokesperson Winston Casio a rumbeng a rugian dagiti pannakabagi ti linteg ti imbestigasion iti kamaudianan a panaglibas ni Alice Guo, agraman dagiti dadduma pay nga indibidual a nairaman ti nagan da iti illegal nga operasion dagiti Philippine Offshore Gaming Operators.
Segun ken ni Casio, sigurado nga adda kinaliway dagiti ahensia a nangipamaysa iti kaso ni Alice ken iti pakabuklan nga operasion.
Kinunana pay a nasayaat no maimbestigaran dagiti amin nga ahensia a nangipamaysa iti daytoy, pakairamanan ti PAOCC a maysa kadagiti nangisayangkat iti panangraut ti dua a dadakkel a POGO sadiay Bulacan ken Pampanga.
Inawagan pay ni Casio a ‘very stupid’ amin nga law enforcers iti daitoy nga operasion agsipud ta dida nabantayan ken napredikta ti garaw ni Alice Guo.
Immunan a nakaawat ti PAOCC iti impormasyon mainaig iti mapapati a panaglibas ni Guo iti dua a speed boat.
Naawatda ti kasta nga impormasyon, maysa nga oras sakbay ti panangpadasda a mangiserbi iti warrant ti mayor iti saanen a nanaganan a lugar.
