BR LA UNION – Pormal a naidatag ti kaunaan nga impeachment complaint kontra kenni Presidente Ferdinand “Bongbong” Marcos Jr. (PBBM) idiay Kamara de Representantes ita nga aldaw.
Ti reklamo ket insumite ni Atty. Andre de Jesus iti Office of the Secretary General ti House of Representatives ken inyindorso ni Pusong Pinoy Party-list Rep. Jernie Jett Nisay.
Kabilang kadagiti reklamo a sangsangwen ti Presidente ket iti:
Betrayal of Public Trust: Gapu iti maipagarop a panangi-surrender kenni sigud a Presidente Rodrigo Duterte iti International Criminal Court (ICC).
Culpable Violation of the Constitution: Gapu iti saanna a panang-veto ti unprogrammed appropriations iti 2026 national budget ken dadduma pay a probisyon iti General Appropriations Act.
Graft and Corruption: Dagiti alegasyon ti kickbacks ken ghost projects, agraman ti maipagarop a panangusar ti “weaponized” nga imbestigasyon ti Independent Commission for Infrastructure (ICI).
Unfitness to Serve: Dagiti akusasyon seknan iti panagusar ti maiparparit nga agas.
Segun kenni Pusong Pinoy Partylist Rep. Jernie Jett Nisay, mamati isuna kadagiti nakailanad iti resolusyon isunga inyindorso na iti nasao a reklamo.
Impaganetget ni Nisay nga inadal ti legal team da ti nasao a reklamo nga inyasideg kenkuana ni Atty. Andre De Jesus ket nakita da nga adda laban daytoy.
Kabayatanna, kinumpirma ni House Secretary General Cheloy Garafil, pormal a naawat da ti opisina na iti reklamo ken naipasidong metten iti inisyal a beripikasyon, maiyannurot iti intuding a proseso ti Kamara.
Ti nasao a reklamo ket dagus a maipatulod kenni House Speaker Faustino “Bojie” Dy III para iti maiyannatop nga aksyon, maiyannurot iti Konstitusyon ken allagaden ti House of Representatives.
Alas-8:45 itay agsapa, Enero 19, 2026 a naisumite idiay Karama babaen kenni atty. Andre De Jesus ti nasao a complaint.
Manipud iti opisina ti Secretary-General, maisumite daytoy iti Office of the Speaker, kalpasanna, maiyindurso idiay plenaryo tapno imandar iti house committee on justice nu talantanen ti complaint.
