Mabalinen nga awaten dagiti indigent senior citizen ti social pensionda iti binulan, tunggal 2 a bulan wenno quarterly ken saanen a tunggal 6 a bulan segun iti Department of Social Welfare and Development.
Iti memorandum circular a naiturong kadagiti amin a regional directors, kinuna ni DSWD Secretary Rex Gatchalian a saanen a maipalubos ti semestral payments, mangrugi inton Hulio 1 ti agdama a tawen.
Mainaig iti daytoy, maibilin kadagiti amin a DSWD Field Offices a surotenda ti baro nga schedule ti social pension granting.
Nakalanad pay iti memo a mabalin a mailaksid ti binulan a social pension no agnanaed ti kaaduan a benepisiario kadagiti nasulinek a lugar wenno no adda iti sidong ti state of calamity ti maysa a probinsia, siudad, ili wenno mapaspasaranda ti armed conflict kasta met dagiti dadduma pay a saan a makontrol a kasasaad a subject to validation dagiti field offices.
Babaen ti Republic Act 11916, mandatory para kadagiti indigent senior citizens nga umawat iti P1,000 manipud iti sigud a P500 ken nagbalin nga epektibo daitoy laeng Enero ti agdama a tawen.
