BR LA UNION – Namnamaen nga umabot iti innem agingga 14 a bagyo ti sumrek iti Philippine Area of Responsibility manipud Marso agingga Agosto, bayat a kumapsot metten ti La Niña ken umadanin ti tiyempo ti kalgaw.
Segun iti state weather bureau, mapaspasaran pay laeng ti epekto ti La Niña ngem agturturong ti pagilian iti ENSO-neutral conditions.
Iti naisayangkat a 193rd Climate Forum, inlawlawag ni state weather bureau Climate Monitoring and Prediction Section chief Dr. Joseph Basconcillo nga agtaltalinaed pay laeng ti La Niña iti tropical Pacific.
Iti ENSO-neutral ket mangdak-dakamat iti sitwasyon nga awan ti agraraira a La Niña wenno El Niño.
Sakbay nga agbalin a normal iti panag-tudtudo a gapwanan ti southwest monsoon wenno habagat iti bulan ti Hunyo, makapadas pay laeng ti dakkel a paset ti Luzon ti ad-adu a dry days.
Patta-patta pay a ngumato iti temperatura ditoy pagilian.
Imballaag ti ahensya , posible a dumanon ti temperatura idiay Metro Manila ti agingga 37.5°C inton bulan ti Abril, bayat a mabalin nga umabot iti 39.9°C iti Northern Luzon.
Inallokoy ti ahensya iti publiko nga itultuloy a padaanan dagiti advisories bayat nga agbalbaliw iti kasasaad ti panawen.
