LA UNION – Immapela ni Israeli Prime Minsiter Benjamin Netanyahu kadagiti umili idiay Lebanon a waya-wayaan ti pagilian da manipud iti militante a Hezbollah tapno malpasen ti giyera.
Iti maysa a video address kadagiti umili ti Lebanon, imbaga ni Netanyahu nga adda pay gundaway dagitoy nga isalbar ti Lebanon sakbay a mailumlom da iti napaut a rinnupak nga agresulta iti destruction ken panagrigat a kas ti agdama a sitwasyon idiay Gaza.
Inaramid ni Netanyahu iti apela kasaruno iti panang-palawa pay ti Israel ti ground invasion kontra Hezbollah babaen ti panag-patulod iti rinibu a tropa iti new zone idiay south-west Lebanon.
Kabayatanna, saan met nga agpa-apekto ti kampo ti Hezbollah iti laksid ti tallon a lawas a nairutan nga air strikes ti Israel ken dadduma pay a panag-atake idiay Lebanon a nakatayan ti nasurok 1,400 a tattao ken nagresulta iti pannaka-displace ti 1.2 milyon a tattao.
