Itantandudo itan ti Department of Migrant Workers ti Philippine Joint Monitoring System Program para kadagiti Pilipino a mangmangged iti ballasiw-taaw.
Karaman ti plano a daitoy ti Kingdom of Saudi Arabia a target a paingeten ken papigsen ti panagtutok ti Overseas Filipino Workers (OFW) sadiay.
Iti maysa a statement, inbinglay ni Undersecretary Patricia Yvonne Caunan ti Department of Migrant Workers nga impamaysa ti departamento iti panangparnuay iti monitoring framework a mangsalaknib ken mangkita kadagiti mangmangged a Pilipino.
Nupay naipakaammon ti Saudi Arabia ti baro a digitalized monitoring system da, impaganetget pay laeng ti undersecretary a ni Patricia Yvonne Caunan ti kinapateg ti naing-inget a koordinasion iti nagbaetan dagiti dua a pagilian.
Namnamaen a kadagiti sumaganad a lawas ket maangay dagiti miting kakadwa dagiti counterparts ti sabali a pagilian tapno maipasdek ken maipatungpal ti joint monitoring framework program ti departamento.
