BR LA UNION – Desisyunan ti Kamara de Representantes ita nga aldaw ti Lunes, Mayo 11, iti impeachment ni Vice President Sara Duterte tapno pasingkedan iti report ti House Committee on Justice a nangibaga nga adda ”probable cause” iti reklamo nga impeachment kontra iti Bise Presidente.
Kasaruno daytoy ti sumagmamano a lawas a panagdengngeg ken panangamiris dagiti dokumento ken ebidensiya nga addaan ranta a paneknekan dagiti alegasyon kontra kenni VP Sara.
Talantanen idiay plenaryo iti committee report ken resolusyon a mangted-dalan tapno maipatulod idiay Senado dagiti Articles of Impeachment para iti panagusig.
Segun kenni Justice panel chairperson ken Batangas Rep. Gerville Luistro, nakasaganan ti komite a depensaan idiay plenaryo iti bukod da a findings tapno makaala ti umdas a botos.
Immunan a nagbotos iti Justice committee, 53-0, tapno ideklara nga adda probable cause tapno ma-impeach ni Sara Duterte.
Iti sidong ti Konstitusyon, kasapolan iti 1/3 a botos wenno 106 botos manipud kadagiti 318 a miyembro ti Kamara de Representantes ti Kongreso tapno maipasa ti impeachment idiay Senado nga agserbi nga impeachment court.
Maisayangkat ti binnotosan babaen ti nominal voting, wenno saggaysa a maawagan ti tunggal kongresista tapno agbotos ti “oo” wenno “hindi.”
Pag-sasaritaan iti plenaryo dagiti uppat a napagtitipon nga Articles of Impeachment a pinasingkedan ti Justice panel kas ti maipagarop a biddut a panangusar iti nasurok P600 million confidential funds, saan a mailawlawag a kinabaknang ti Bise, alegasyon a pinnasoksokan iti Department of Education, ken maipagarop a panangipangta kada Presidente Ferdinand Marcos Jr., First Lady Liza Araneta-Marcos, ken sigud nga House Speaker Martin Romualdez.
