Maysa a resolusion ti House of Representatives ti mangidagdagadag iti Philippine Health Insurance Corporation (PhilHealth) nga implementaren ti sabali pay a round ti 30-percent increase iti amin a benefit packages ken coverage-na.
Ti House Resolution No. 1900, nga inpila ni Agri Party-List Representative Wilbert Lee, ket agsapsapul a mangikeddeng no kasano a ti PhilHealth ket napardas a mapaadu dagiti agdama a benepisio ken mangiyam-ammo kadagiti baro a pakete ti benepisio kas iti pannakairaman kadagiti vital diagnostic tests ken dadduma pay a nasken nga eksamen iti laboratorio kas outpatient services.
Para iti pagimbagan dagiti benepisiario ken kontributor, impaganetgetna ti pannakasapul a mapaadu ti amin a benefit packages ken coverage ti PhilHealth tapno kamaudiananna maipababa ti out-of-pocket costs dagiti Pilipino para kadagiti kasapulanda iti healthcare.
Kinuna pay ni Lee a nangipatulod isuna iti surat ken ni PhilHealth President ken Chief Executive Officer a ni Emmanuel Ledesma Jr. idi Huebes, a nangidagadag iti state insurer nga ipatungpalna ti panagngato.
Dinakamatna ti kaadda ti PhilHealth iti dakkel a pondo ken ti pannakayakar ti PHP89.9 bilion a sobra nga urnongna iti national treasury, a mangpaneknek nga ad-adda a kabaelan a palawaen dagiti benefit packages-na ken mabalin pay nga iyam-ammo dagiti baro a benepisio tapno masakupan ti ad-adu nga aktual a gastos iti pannakayospital.
Sipapasnek nga induron ni Lee ti 30-porsiento nga across-the-board a panagngato dagiti benepisio ti PhilHealth a naipatungpal idi Pebrero katorse.
