BR LA UNION – Imbilin ni Police Colonel Redentor C. Ulsano, Provincial Director ti La Union Police Provincial Office (LUPPO), iti nainget nga imbestigasyon ken security restrictions, kalpasan ti riribok a maipagarop a pinataud ti sumagmamano a grupo dagiti residente idiay Barangay Urbiztondo, San Juan, La Union idi Biyernes, Abril 10, ken nagwaras iti social media.
Iti statement nga inruar ni PCol. Ulsano, impaganetget na a ti naibinglay a video ket maisupadi iti natalna ken nasayaat a kababalin dagiti umili ti La Union.
Siniguro ni Ulsano a mapagsungbat amin a mapaneknekan a karaman iti insidente, agsipudta saan nga ipalubos dagiti otoridad dagiti riribok wenno anyaman a kita ti “public scandal” a mangipaay ti peggad iti kinatalged ken talna dagiti turista ken lokal nga umili.
Kas sungbat, imbilin ni Ulsano ti panangi-deploy ti kanayunan a puwersa manipud 1st La Union Provincial Mobile Force Company (1stLUPMFC) ken panangipasdek ti Police Assistance Desk iti nasao a barangay nga agbantay ti 24/7 tapno malapdan dagiti kriminal nga aktibidad.
Iti sidong ti liderato ni Ulsano, siniguro na nga agtaltalinaed ti commitment ti PNP a “To Serve and Protect” ket agtalinaed ti La Union a “safe haven” wenno natalged a lugar para kadagiti turista ken umili.
Nagpanawagan ti LUPPO iti siasinuman nga adda kanayunan nga impormasyon wenno video evidence mainaig iti nasao nga insidente a makiuman ken makitinnulong iti San Juan MPS para iti napartak a pannakarisut ti kaso.
