BR LA UNION – Target ni Presidente Ferdinand Marcos a mapukaw ti kanser ti kurapsiyon iti kagimongan.
Inadmitir ni Presidente Marcos Jr. a nariribuk ken nasakit dagiti panagbalbaliw nga ipat-patungpal ti administrasyon gaputa kayat na a baliwan ti sibubukel a sistema a nabayagen a dominado ti kurapsyon.
Segun iti Chief Executive, ti panangdalus iti nauneg a kanser iti gobyerno ket kaiyarigan a dakkel nga operasyon wenno major surgery a saan a maliklikan a pakaigapuan ti panagsagaba.
Kimmiddaw pay ti dispensar ni Presidente Marcos iti publiko gapu iti epektona, ngem impaganetgetna a no saan a maaramid daytoy ket agtultuloy laeng ti dakes nga aramid iti napalabas a tallo a dekada.
Imbaga ti Presidente nga nga ammo ti team-na ti direksiyon ken saanda a mapukaw iti dalan, nangruna iti panangituloyda iti kampanya kontra korapsyon ken abuso.
Nupay narigat ti agdama a kasasaad, namnamaenna a dumteng ti aldaw a maibaga dagiti Pilipino a “napateg” dagiti sakripisiyo.
Impaganetgetna a mabalin nga atiddog ti proseso, ngem no agtultuloy ti panagtrabaho, maragpat dagiti tarigagayan a nasayaat a resulta.
