Pinasingkedan ti Department of Justice a pormal dan a naipila iti korte ti kaso kontra iti kontratista a ni Sarah Discaya maipapan ti saritaan a panagbayad ti buis.
Segun kenni Justice Spokesperson Atty. Polo Martinez, maitunos daitoy idi nadakamat ti prosekusyon nga adda iti umdas a basaran tapno maipilan a kas kaso ti sangsangwen ni Discaya.
Nabigbigen ti panel of prosecutors ti kaadda ti ‘prima facie evidence with certainty of conviction’ isu a naipangato sadiay Court of Tax Appeals.
Napilaan ti uppat (4) a bilang ti kaso a ‘tax evasion’ ti kontratista gapo iti pannakapaay na a bayadan ti maiyannatop a buis para ti taxable year 2020 ken 2021 – tunggal taxable year ket nakitaan ti panaglabsing ti Sections 254 ken 255 ti National Internal Revenue Code ti Pilipinas.
Babaen iti linteg ket inggagara ni Discaya a takasan iti umiso a panagbayad ti buis agraman ti pannakapaay na a panangibinglay ti pudno nga impormasyon mainaig kadagiti babayadan.
Malaksid kenni Sarah Discaya ket sumangsango metlaeng ti kapada a kaso ti asawa na a ni
Pacifico ‘Curlee’ Discaya ngem aminado ti Department of Justice a naitantan paylaeng iti panagkaso kadaitoy.
Imbatad ni Justice Spokesperson Martinez a nangipila ti mosyon ti kampo ni Discaya isu a saan a natuloy ti panangipila ti kaso.
