Umab-aboten iti Nasurok a 2,000 ti nairekord a kaso dagiti baboy a naapektaran iti African Swine Fever iti Region One.
Ni Dr. Alfiero Banaag, Chief Regulatory Division ti Department of Agriculture Region 1 ket naggapu iti probinsia ti La Union ken Ilocos Sur tapno kitaen ti agdama a kasasaad ti sakit.
Natakuatan a walo nga lugar ti apektado ditoy La Union a pakairamanan ti Luna nga addaan iti 893 a kaso, 60 a kaso iti Bangar, 59 iti San Fernando, 27 iti Bacnotan, 50 iti San Juan, 69 iti Santol, ken innem iti Rosario.
Idinto nga innem met nga ili ti apektado idiay Ilocos Sur pakairamanan ti Tagudin nga addaan iti 64 a kaso, Candon City nga addaan iti 271, Galimuyod 91, Lidlidda 4, San Ildefonso 9, ken Bantay 54.
Kinuna ni Dr. Banaag a nakadepende kadagiti naapektaran a lugar no ideklarada ti state of calamity agsipud ta maibasasr latta daytoy iti bilang dagiti naapektaran a baboy.
Kabayatanna, inbinglayna pay a dagiti naapektaran idi bulan ti Pebrero ket nabayadanen ken P535,000 ti naited iti ili ti Rosario.
Iti agdama, maad-adal pay ti pamay-an iti tunggal ili mainaig no mano a bakuna ti maitedda.
Nagpalagip ti ahensya kadagiti agartaraken iti baboy nga nu ada dagiti makita da nga adda sintomas ti nasao nga sakit, nasaysayaat nga maireport a dagus tapnu masigud ken maiyaramidan ti aksyon.
