Dumanonen ti 13 iti kaso ti Andes hantavirus, pakairamanan dagiti tallo a pimmusay nga itan ket dumanon ti 23% iti fatality ratio na.
Kadagitoy ket 11 iti kumpirmado iti uneg ti laboratoryo ken dua met ti probable cases.
Daitoyen ti maika-uppat a padamak ti outbreak nga adda pakainaiganna ti cruise ship travel kalpasan nga ipakaammo ti WHO idi Mayo 2 dagiti kaso ti nakaro a respiratory illness manipud iti barko nga M/V Hondius.
Maibasar iti kaudian a report idi Mayo 13, tallo manen ti baro a kaso ti nailista manipud Canada, Netherlands, ken Spain.
Dagiti sigud nga inconclusive case idiay Estados Unidos ket napaneknekan a negatibo ken naikkaten ti listaan.
Kabayatannna, amin met a kaso ket kumpirmado a nagtaud metlaeng kadagiti pasahero wenno crew ti barko.
Gapo iti agingga innem a lawas nga incubation period, posible manen iti kanayunan a kaso kabayatan ti panaglabas ti lawas.
Babaen ti International Health Regulations (2005), nakikoordinar ti National IHR Focal Points para ti international contact tracing and monitoring.
Kinuna ti World Health Organization a nababa ti peggad ti sakit iti sangalubongan a populasyon ngem agtultuloy ti panagbantay da iti sitwasyon. Impasigurado da met iti masansan nga health updates, nu kasapulan.
