Katupag ti Social Security System contribution hike ket dagiti benepisyo.
Daitoy ti kinuna ni Francisco Pentecostes, Branch Head ti Social Security System ditoy La Union kagiddan dagiti agririri iti panagngato ti binulan a kontribusyon ti ahensya.
Inlawlawag ni Pentecostes a dagiti maitintinnag a kontribusyon ket mapmapan kadagiti benepisyo para iti sickness, maternity, disability, retirement, agraman ti death claim with funeral.
Impaganetget na ti kinapateg ti panagtinnag iti kontribusyon agsipud ta ditoy a nakadepende ti masakbayan ti mangmangged; nu adda iti naurnong a kontribusyon, nakasiguron iti pension ti tao para ti tawen a panagretiro.
Saan nga idawdawat, ngem apaman pumusay ka ket adda maibati a mapagnumaran para kadagiti beneficiaries mo.
Nakailanad ti RA 11199, adda iti step-by-step increase of contribution: panggep ti SSS ti viability ti pension fund, manipud iti 12% idi 2019, 13% idi 2020, 14% idi 2023, ken 15% met para ita a tawen 2025.
Daitoy a kanayunan a kontribusyon ket baklayen ti ti agpada nga employer ken employee. Nu ti empleyado ket voluntary wenno self-employed, isuna amin ti mangtinnag.
Segun kenni Pentecostes, pagsyaatan para ita a tawen, ngimmaton iti minimum bracket manipud iti 4k-bracket idi 2024, nagbalinen a 5k-bracket ita a 2025, manipud 30k ket nagbalinen nga 35k.
Kabayatanna, nagpakdaar met ti opisyal a saan nga mabalin nga ti employer ti agdesisyon nu mano ti itinnag na a benepisyo para iti empleyado na. Obligado ti employer iti 10% ken 5% para iti empleyado a maitinnag nga kontribusyon.
Adda met iti contribution table maibasar iti suweldo ken nakailanad payen ti katupag a konribusyon ti agpada nga employer ken employee nu kasta ket masiguro nga umiso dagiti maikalkaltas.
Paregtaen na met amin a mangmangged a kanayon a kitaen ti payslip ken ibasar iti contribution table.
Mabalin a mangipila ti reklamo iti SSS ken Department of Labor and Employment nu saan a matintinnagan ti benepisyo wenno palso dagiti kantidad nga ikiskissay ti employer.
