Timmaud ti maysa a saludsod kabayatan ti House Quad Committee hearing maipapan kadagiti transaksion ni Alice Guo ken ti mabalin a koneksionna kadagiti Fujian gang syndicates.
Segun kenni Batangas 2nd District Representative Gerville “Jinky Bitrics” Luistro, adda ti suspetsa a konektado ni Guo kadagiti indibidual manipud Fujian, maysa a rehion iti China a nagtaudan iti nasao nga gang.
Maysa kadagiti naiparang nga ebidensia ket ti ‘congratulatory poster’ manipud kadagiti negosiante nga Tsino a nakabase idiay Manila, a naggapo idiay Fujian, ken nagselebrar idi iti pannakabotos ni Guo kas “first Chinese mayor in the Philippines” idi 2022.
Kasta met segun iti nairuar nga impormasion manipud iti rekord ti Bureau of Immigration, a mangibagbaga a ni Guo kas ‘dependent’ iti inana a ni Lin Wen Yi, a nitibo metlaeng ti Fujian.
Dinakamat pay ni Luistro a ti dua a kasosio ni Guo ken padana nga incorporators ti Bamban-based Baofu Land Development Incorporated nga isuda Lin Baoying ken Rujin Zhang — nga agpada a nasentensiaan iti panaglabsing iti money-laundering idiay Singapore, ket agpada a taga-Fujian metlaeng.
Pagduaduaan itan dagiti kongresista no naiparna dagitoy a koneksion wenno pakakitaan nga adda talaga ti pakainaigan ni Guo kadagiti illegal nga aktibidad a konektado iti Fujian gang.
Idi napagsaludsodan, inlibak ni Guo ti aniaman nga ammona maipapan iti Fujian gang.
Agparparang iti hearing ti Quad Committee a ni Guo ket maysa nga Insik a nanggundaway kadagiti loopholes iti sistema ti Pilipinas tapno agnegosio ditoy pagilian a maipagarup a konektado kadagiti sindikato.
Impalgak ni Luistro a nainaig ni Guo kada Lin ken Zhang, nga agpada a nasentensiaan idiay Singapore gapu iti money- laundering iti $3 bilion, agraman ti sabali pay nga incorporator a ni Huang Zhiyang, a karaman met iti cybercrime kalpasan a rinaut dagiti autoridad ti 2023 .
Karaman da Alice Guo, Lin Wen Yi, Lin Baoying ken Rujin Zhang iti operasion dagiti Philippine Offshore Gaming Operators (POGOs), partikular ti Hongsheng Gaming Technology ken Zun Yuan Technology, a konektado iti human trafficking ken money laundering.
Impalgak iti hearing a nakagun-od ni Guo iti peke a birth certificate ken Philippine passport babaen ti late registration ti birth system, isu a nakataray ken nabutosan a kas opisial ti gobierno ken nakaipasdek pay kadagiti ilegal a negosio.
Gapu iti daytoy, nangisingasing ni Luistro iti reporma tapno malapdan dagiti ganggannaet a manggundaway iti kinakapuy ti Sistema ti Pilipinas ken inrekomendandar na iti Securities and Exchange Commission ti panangipatungpal kadagiti naing-inget a pagannurotan tapno masigurado a lehitimo dagiti korporasion a mairehitro ditoy pagilian.
Impaganetgetna pay ti pannakasapul iti naing-inget a linteg kontra iti money laundering, a nangidakamat a nakalasat ti illegal nga operasion ti POGO gapu kadagiti saan a regulado a pinansial a transaksion.
Gapu iti daytoy, dinamag ti committee chair a ni Ace Barbers ni Alice Guo no adda ammona maipapan iti koneksion nga inladawan ni Cong Luistro, ngem insungbat ni Alice, awan ti ammona maipapan iti dayta; Kinapudnona, kinunana a dayta ti umuna a gundaway a nangngegan na ti maipapan iti Fujian gang, banag a kinatawaan met ni Cong Luistro.
Idi ad-adu pay ti dinamag ni Barbers, inaklon ni Alice a taga-Fujian ni tatangna.
Seryoso a problema dagiti naipalgak nga aktibidad ni Guo ken posible a koneksionna kadagiti sindikato no kasano a manipularen dagiti ganggannaet dagiti sistema ti Pilipinas kadagiti illegal nga aktibidadda.
Idurduron itan dagiti mammanday-linteg ti madagdagus a reporma kadagiti nagkurangan ti linteg tapno masalakniban ti pagilian manipud iti ad-adu pay a pannakagundaway.
