Pinaboran ti Korte Suprema a nangabak kas mayor ti ili ti Agoo, La Union ni Frank O. Sibuma iti napalabas a May 9, 2022 national & local elections.
Maibasar iti nagbalin a decision ti Supreme Court, siyam (9) ti pimmabor kenni Mayor Sibuma, lima (5) ti pimmabor kenni sigud a Mayor Stefanie Ann Eriguel Calongcagon ken maysa ti nag-abstain.
Iti decision ti SC en banc ti pannakawaswas ti resolution ket gaputi inpaulog ti Commission on Elections (Comelec) idi Mayo 13, 2022 a nangkanselar iti Certificate of Candidacy (Coc) nga inpila ni Mayor Sibuma ken ti Writ of Execution a napetsaan idi Hunyo 29, 2022 a nangkanselar iti proklamasion ni Sibuma kas mayor ken nangibilin iti pannakai-proklamar ni Calongcagon kas mayor.
Maipalagip, nangipila ni Alma Panelo ti petition iti Comelec a nangkiddaw iti pannakakanselar ti CoC ni Sibuma gapu iti isyu iti residency na.
Maibasar iti petisyon ni Panelo, saan nga a residente ti Sta. Barbaro, Agoo, La Union ni Sibuma agsipudta isuna ket taga San Eugenio, Aringay, La Union.
Impaganetget iti dipensa ni Mayor Sibuma, a residente isuna ti Agoo agsipudta sadiay a naipasngay ken nagturpos iti high school idiay Don Mariano Marcos Memorial State University-Agoo Campus.
Iti nagbalin a pangngeddeng ti Korte, nakaaramid ti Comelec Second Division ti “grave abuse of discretion” idi inbilin ti komisyon ti pannakaselar ti CoC ni Sibuma.
Nailanad iti nagbalin a decisyon ti Korte Suprema a napaay ti Comelec Second Division a nangresolbar ti petition ni Panelo kasangwanan ti May 9 elections ken nagtalinaed ti nagan ni Mayor Sibuma iti balota ken nagasat a nangabak kas mayor idi napalabas a May 9 national & local election.
Gapu iti nasao a desisyon, maragsakan ni Mayor Sibuma a naiyulog ita nga aldaw, Enero 26, 2023.
Kabayatan na, kangrunan a nagyamanan ni Mayor Sibuma iti Namarsua gaputa nangngegan iti inkiddaw na a kararag.
