BR LA UNION – Mamati ni Armed Forces of the Philippines (AFP) Chief of Staff General Romeo Brawner a saan a solusyon iti kudeta wenno military junta iti anyaman a problema a sangsangwen ti pagilian a pakaibilangan ti isyu iti pulitika.
Gaputi dayta, nagpanawagan ni Brawner kadagiti umili a Filipino a maaddaan ti talek iti electoral process ti pagilian ken usaren iti umadanin a 2025 midterm elections kas platform tapno iwaragawag dagiti isyu ken namnama para iti masangwanan.
Kinuna ti Chief of Staff a gaputi kaadu ti problema a sangsangwen ti ili, aglalaok metten iti mapan-panunot a kas ti kudeta wenno military junta.
Nupay kasta, impaganetget ni Brawner a ti ka-epektibwan a solusyon iti panangresolba kadagiti sangsangwen a problema ti ili ket iti eleksiyon.
Impaganetget ni Brawner, iti eleksiyon ti mangipaay ti oportunidad kadagiti umili nga iruar ti arungaing babaen ti panangibotos kadagiti lider a mangsolbar kadagiti problema ti ili.
Segun kenni Brawner siguradwen ti militar nga agtalinaed iti kari da nga agbalin a nawaya, natalged ken nakapya iti 2025 midterm elections.
