BR LA UNION – Papigsaen dagiti otoridad iti pannaka-implementar ti Provincial Ordinance No. 498-2025 tapno masigurado ti kinatalged dagiti agtutubo ken masalakniban ti publiko kontra iti dakes a pasamak, a posible a patauden ti dakes nga epekto iti panagkonsumo ti arak.
Nakailanad iti Provincial Ordinance 498-2025 wenno “An Ordinance to Protect Minors and the Public from Alcohol-Related Harms by Regulating Access, Marketing, and Consumption of Alcoholic Beverages Providing Penalties, Intervention Measures, and Appropriations Thereof” dagiti maiparit nga aramiden dagiti agtutubo wenno menor de edad.
Dagitoy ket iti sumaganad:
- Panaglako wenno pannakaiwaras ti nasanger a mainom kadagiti menor de edad.
- Panaggatang ti arak dagiti menor de edad. Karaman iti panaggandat a gumatang, pannakapaay a gumatang ken panag-konsumo ti arak.
- Panaginom ti arak dagiti agtutubo iti pampubliko ken pribado a lugar, malaksid nu paset iti cultural traditions wenno religious rites.
- Panang-impluwensiya dagiti menor de edad nga uminom wenno aggatang ti Alcoholic Beverages (Enabling)
- Maiparit ti agilako kadagiti lugar nga asideg kadagiti ubbing ken agtutubo
- Panang-peke ti edad ken kinatao
- Pannakapaay a mangiparang ti Identification Card nu kiddawen ti aglak-kalako
Impakdaar dagiti otoridad a siasinoman a manglabsing iti nasao nga ordinansa ket sumango iti maitutop a dusa, intervention measures, ken multa.
