LA UNION – Maysa a lalaki ti nabagsol idiay ili ti Balaoan gapu laeng iti isyu ti mapukukaw a tsinelas.
Ti biktima ket nabigbig a ni Alejandrino Camat Jr., 51-anyos bayat a ti suspek ken ni Bienvenido Raquedan, 79-anyos, agpada a residente iti Brgy. Patpata.
Immuna iti daytoy, naamuan a matmaturog ni Camat iti kalapawda idi immasideg ni Raquedan ket nagtongtongda.
Nupay kasta, kellaat dagitoy a nagrikiar kalpasan a pinabasol ni Camat a ti suspek ti nangilemmeng iti tsinelasna banag a nakasairan ti rikna ni Raquedan.
Nagawid ti suspek iti balayda ngem nagsubli met laeng nga armado iti kutsilio nga agatiddog iti 12 a kadapan, kasaruno ti panangbagsolna ken ni Camat.
Naitaray a dagus iti ospital ti biktima bayat a boluntario met a simmuko kadagiti otoridad ti suspek.
