BR LA UNION – Posible a sumrek iti Philippine Area of Responsibility (PAR) ita a rabii ti Martes, Setyembre 30, iti low pressure area (LPA) nga adda iti daya ti southeastern Luzon.
Segun iti Philippine Atmospheric, Geophysical and Astronomical Services Administration (PAGASA), ti nasao nga LPA ket naudi a nasaripatpatan iti kaadayu 1,360 km daya ti southeastern Luzon ken addaan ti medium chance a mabukel kas tropical depression iti sumaganad a 24 nga oras.
Nu mabukel kas bagyo, maawagan ti tropical depression “Paolo” ken maika-16 a dakes a panawen para iti tawen 2025.
Maibasar iti projected track ti bagyo, dumalan iti nagnaan ti napalabas a tropical cyclone Nando ket posible nga agturong iti Babuyan ken Calayan group of islands wenno iti Northern Luzon.
Gaputi dayta, namnamaen a mangigubway ti baro a cyclone ti panagtudtudo iti Northern Luzon inton Biyernes, Oktubre 3, 2025.
Posible nga aglandfall idiay Cagayan area ken dumanon iti tropical storm category sakbay nga agdisso iti kadagaan. (PNA)
