BR LA UNION – Agtultuloy a mabanbantayan iti Low Pressure Area (LPA 07j) nga adda iti kaadayu a 1,225 daya amianan-a-daya ti Extreme Northern Luzon wenno adda pay laeng iti ruar ti Philippine Area of Responsibility (PAR), agsipudta nangato ti posibilidad nga agbalin a tropical depression wenno bagyo iti sumaganad a 24 nga oras.
Segun kenni weather specialist Loriedin De la Cruz-Galicia, laksid nga adayu pay laeng iti kadagaan ti Pilipinas iti nasao nga LPA, asidegen daytoy iti nagbeddengan ti PAR ken posible a sumrek apagbiit sakbay nga aglisi agturong iti amianan-a-daya.
Nu mabukel a bagyo ken sumrek iti PAR, maawagan a bagyo “Fabian”, iti kaunaan a bagyo ita a bulan ti Agosto ken maika-innem ita a tawen 2025.
Ngem awan pay ti direkta nga epekto na iti pagilian, ngem namnamaen a papigsaenna manen iti habagat (southwest monsoon) isunga agbalin a naulep ken makapadas ti mawaras-waras a panagtudo, panaggarru-od ken panagkimat iti sumagmamano a paset ti Luzon, kas ti Ilocos Region, Batanes, Babuyan Islands, Zambales, ken Benguet.
Uray idiay Metro Manila ken dadduma pay a paset ti Luzon ket posible a makapadas ti kellat a panagtudo a gapwanan ti localized thunderstorms.
Idiay Visayas ken Mindanao, maaddaan met ti nakuyem a panawen ken posibilidad nga apagbiit a panagtudo.
Patta-patta ti PAGASA, tallo a bagyo iti posible a sumrek wenno mabukel iti uneg ti PAR ita a bulan ti Agosto, ken agingga 16 a bagyo manipud Agosto agingga Disyembre.
Imbaga pay ti ahensya a nangato iti posibilidad a La Niña phenomenon iti sumarsaruno a bulan, a mabalin a mangigubway ti nasursurok ngem normal rain ken mas aktibo a panawen dagiti bagyo.
