LA UNION – Nakasaganan iti La Union Electric Cooperative wenno LUELCO-Bangar Branch ingkaso nga adda iti mapasamak a power interruption inton kaaldawan ti eleksiyon, inton Mayo 9, 2022.
Siniguro ni Emannuel Flores, agdama a LUELCO-Bangar Branch Manager, nga adda iti nakasagana nga addang dagitoy nu bilang adda iti panagpukaw iti supply ti koryente inton alaw ti eleksiyon.
Kinapudno na, idi Marso 30 ket addan iti abiso ken direktiba manipud Dept. of Energy, nga isagana iti amin a pamay-an ken wagas agraman dagiti personnel ti LUELCO ingkaso a tumpuar ti aberya iti supply ti koryente inton kaaldawan ti panagbobotos.
Malaksid iti ili a Bangar, iti LUELCO-Bangar Branch ket sakopen na pay iti ili a Sudipen, Luna, ken Santol, La Union.
