Nangisayangkat ti Luna Municipal Disaster Risk Reduction and Management Council (MDRRMC) ti maysa a panagtataripnong ti Pre-Disaster Risk Assessment (PDRA) idi Hunio 23, 2026 tapno mapagtungtungan dagiti posible a risgo ken masigurado ti kinasagana ti munisipyo iti baet ti agsaksaknap a kasasaad ti paniempo.
Indauluan ni Municipal Mayor Gary Pinzon ti diskusyon a tinabunuan dagiti kameng ti MDRRMC, pannakabagi manipud iti nadumaduma a response clusters, ken partner agencies tapno mapagsasaritaan dagiti wagas ti panagsagana ken mapapigsa ti koordinasion no adda emerhensia.
Kabayatanna, kinita ti konseho dagiti kaudian a report mainaig iti Bagyo Francisco nga adda iti uneg ti Philippine Area of Responsibility (PAR).
Napagsasaritaan met dagiti posible nga epektona, agraman ti pimmigsa a monsoon, napigsa a tudo, ken dadduma pay a peggad a mainaig iti paniempo a mabalin a mangapektar iti nadumaduma a paset ti pagilian.
Karaman kadagiti kangrunaan a napagsasaritaan ket ti umdas a suplay ti emergency equipment ken ti kinasagana dagiti response mechanisms dagiti nadumaduma nga ahensia tapno masigurado ti dagus a tulong ken episiente a disaster response no kasapulan.
Inrepaso ti konseho dagiti agdama a protocol ken impaganetgetna ti kinapateg ti nasinged a koordinasion iti nagbaetan dagiti amin a maseknan nga opisina tapno mataginayon ti kinasagana iti aniaman a kasasaad.
Pinaregta ni Mayor Pinzon dagiti amin nga ahensia nga ituloyda ti panagsagana ken agtalinaed nga alerto kadagiti sumaruno a pakaammo ken panagbalbaliw ti panawen tapno masigurado ti kinatalged ken pagimbagan ti tunggal Luna Bannuar.
Ti pannakaipatungpal ti PDRA ket maitunos met iti Sustainable Development Goal (SDG) 11 wenno Sustainable Cities and Communities, a panggepna a papigsaen ti disaster resilience ken pasayaaten ti kapasidad dagiti lokal a gobierno iti panangkissay iti peggad ken panangsungbat kadagiti didigra. (Bombo Alphea Pasquin)
