BR LA UNION – Nangidatag ti reklamo a cyberlibel ni House Deputy Speaker Ronaldo Puno kontra kenni Cavite 4th District Representative Kiko Barzaga gapu iti bribery posts na iti social media.
Nagramot daytoy iti nagbalin a waragawag ni Barzaga iti online, a maipagarop nga immawat dagiti padana a mammanday-linteg manipud iti National Unity Party (NUP) ti pasuksok manipud kenni business tycoon Enrique Razon tapno suportaran ti speakership bid idi ni Leyte Representative Martin Romualdez iti panaglukat ti 20th Congress.
Ni Cong. Puno ti nangipila ti reklamo kontra kenni Barzaga iti Office of the City Prosecutor idiay Antipolo.
Kinuna ti mammanday-linteg nga adda consequences dagiti tignay nangruna no daytoy ket malisyoso ken nalawag a panggepna a mulitan ti reputasyon nga awan ti basaran.
Innayon ti kongresista a saan a basta akusaran ti maysa nga indibidual ti maysa a krimen, irakurak iti minilyon a tattao ken ilemmeng dagiti kalukwan iti likudan ti social media.
Mainaig iti daytoy, impaganetget ni Puno nga ipursige da a naan-anay a pagsungbaten iti sidong ti linteg.
Immunan a nangipila ni Razon iti kaso a cyber libel kontra kenni Barzaga gapu iti isu met laeng nga alegasyon.
Kabayatanna, nakatuding nga agpaso iti suspensiyon ni Barzaga inton Enero 30 a nagramot iti “reckless and inflammatory” a social media posts-na, gapu iti baro a reklamo kontra iti neophyte lawmaker.
