BR LA UNION – Kinumpirma ni City Veterinary Officer Dr. Flosie Decena, a nakailista da manen ti kaso ti African Swine Fever (ASF) iti lima a barangay ditoy siyudad ti San Fernando, La Union.
Iti pannakiuman ti Bombo Radyo La Union kenni Dr. Decena, kinuna na a ti Barangay Tanqui ti immuna a nakakumpirmaran ti ASF manipud iti taraken ti maysa a hog raiser, idi maudi a paset ti bulan ti Hulyo, agdama a tawen.
Simmaruno iti barangay Cadaclan, Cabaroan, Dallangayan Oeste, ken Narra Este ditoy siyudad ti San Fernando.
Amin a naala a blood samples manipud kadagiti suspected swine ket nagpositibo ti nasao a sakit.
Aminado ni Dr. Decena a nag-recur wenno nagsubli manen iti sakit nga ASF kadagiti taraken a baboy iti sumagmamano a lugar ditoy siyudad isutgapuna a pinapigsa manen ti ar-aramiden da ita a bio security measures, dagiti addang a mangsalaknib kadagiti taraken a baboy.
Iti panang-kontrol ken panang-prebentar iti panagwaras ti African Swine Fever (ASF), kasapolan kuna ti opisyal iti panangiyemplementar ti istrikto a biosecurity measures, a pakairamanan ti panang-establisar da ti animal quarantine checkpoints, restriction iti movement dagiti live hogs within one-kilometer radius manipud iti affected areas.
Dadduma pay nga ipatpatungpal ti CityVet ket panangipawil ti backyard slaughtering ken panaglakwan ti karne ti baboy a saan nga otorisado (no meat inspection certificate), ken intensified public awareness campaigns seknan iti nasao a sakit.
Inallokoy ni Dr. Decena dagiti hog raisers a maki-koordinar iti opisina na, babaen iti panag-report nu adda dagiti suspect cases ken gumatang ti produkto wenno pork products iti legitimate ken inspected sources kas koma iti merkado publiko.
Innayon pay ni Dr. Decena, a mangisay-sayangkat da iti seminar ken caravan seknan iti ASF, a nakipasetan Dept. of Agriculture, Bureau of Animal Industry, ken dadduma pay nga stakeholders kas iti hog raisers cooperative, meat vendors, consumers, ken dagiti aglaklako ti hog feed.
Iti laksid a nagsubli manen ti sakit dagiti baboy iti sumagmamano a barangay ditoy siyudad, siniguro ni Dr. Decena a natalged manipud ASF dagiti mailaklako a karne ti baboy iti merkado publiko ditoy siyudad ti San Fernando.
