Impasigurado ti Office of the Provincial Veterinarian La Union nga natalged ken ASF-Free dagiti mailaklako nga karne ti baboy kadagiti pampubliko a mercado kagiddan ti agtultuloy nga kaso ti African Swine Fever ditoy La Union.
Manipud iti agtultuloy nga addang ti Office of the Provincial Veterinarian ket nakontrol ti panagwaras ti nasao a sakit iti baboy ditoy probinsya.
Segun kenni Provincial Veterinarian, Dr. Domingo Bobby C. Calub III, idi September 23, 2024 ket naduktalan da nga dagiti kaso ti ASF ket manipod kadagiti ili ti Balaoan, Luna, Bangar, Bacnotan, San Juan, Santol, Rosario ken ditoy Ciudad iti San Fernando.
Kadagitoy a kaso ket 55 ti index cases ken addan pakabuklan nga 2,999 iti naipasidong ti culling manipod iti 402 nga apektado nga agtartaraken iti baboy.
Naduktalan pay ti Provincial Veterinarian nga nagwaras ti sakit iti baboy babaen iti panagparti wennu panag-uraga kasta met iti kontaminasyon babaen kadagiti dingraw wennu ngilaw.
Impaganetget ni Dr. Calub nga agtultuloy ti ar-aramiden da nga addang kas iti culling, ASF testing, quarantine checkpoints, farm biosecurity ken iti nainget nga panangipatungpal iti Provincial Ordinance No. 417-2023 – a mangregulate iti animal quarantine tapnu maliklikan iti panagwaras ti makaakar a sakit ti ayup.
Impasigurado pay ti Veterinary Office dagiti pinansyal ken teknikal a tulong nga maited kadagiti nakaro nga naapektaran, ken kumidkiddwa ti opisina manipod kadagiti opisyal ti La Union iti nadagdagsen a pannusa kadagiti aglabsing iti ordinansa kasta metten iti amyendar tapnu ikkan ti bileg dagiti opisyal to barangay a mangipatungpal kadagiti paglintegan ken quarantine.
Dagiti nakaipasidong ti quarantine a barangay ket saan a mapalubosan a maibiahe dagiti sibibiag a baboy iti ruar ken dagiti mabalinen nga ilako a baboy a na-testing nga agnegatibo iti virus ket dagus nga maiturong iti slaughterhouse.
Kabayatanna, nabaliwan metten dagiti sumagmamano a wagas: masapulen a ma-cull amin a baboy iti uneg ti 1-kilometer radius ti lugar ti naapektaran a baboy, nabaliwan daytoy manipud iti 500-meter radius idi bulan ti Septiembre.
Makaawat met dagiti agtartaraken iti maximum of 20 pigs a ma-cull iti indemnifications manipud iti Department of Agriculture.
Daitoy ket P4-K iti tunggal baboy para kadagiti burias, P8-K kadagiti growers ken fatteners, ken P12-K para iti breeders.
